Feeds:
பதிவுகள்
பின்னூட்டங்கள்

Archive for ஜூலை, 2015

“கத்தியைப் பிடிச்சு மரக்கறிதன்னும் வெட்ட முடியுதே. இந்தக் கையாலை பெருந்தொல்லை” என்றவர் ஒரு பெண்மணி என்பதைப் புரிந்து கொண்டிருப்பீர்கள்.

கை என்று பொதுவாகச் சொன்னாலும் மணிக்கட்டைத்தான் குறிப்பிட்டார். அதுவும் ஒரு பக்கத்தில் மட்டுமே. இன்னும் தெளிவாகச் சொன்னால் மணிக்கட்டின் வெளிப்புறமாக கட்டை விரலும் மணிக்கட்டும் சந்திக்கும் இடத்தில்தான் வலி.

DeQuervainslabel-01(2)

நோயின் குணங்கள்

மணிக்கட்டின் வெளிப்புறத்தில் ஏற்படும் இந்த நோய்க்கு வாயில் நுழைய மறுக்கும் ஒரு பெயர் மருத்துவத்தில் உண்டு. ‘டி குயர்வெயினஸ் ரீனோ சைனொவைடிஸ்’ (De Quervain’s tenosynovitis)  என்பதாகும்.  இது மூட்டுகளில் ஏற்படும் மூட்டு நோயல்ல. அதாவது ஆர்திரைடிஸ் (Arthritis)  நோயல்ல.

மணிக்கட்டின் ஓரமாகச் ஒரு திசுப்படலத்தின் ஊடாச் சென்று பெருவிரலை அடையும் தசைநாணில் (tendon)  ஏற்படும் நோயாகும். பெருவிரலை ஆட்ட வளைக்க உதவுவது அந்தச் தசைநாண்தான். தசைநாணை சவ்வு என்றும் சொல்லலாம்.

இந் நோய் உள்ளவர்களுக்கு மணிக்கட்டை வளைக்கும் போதும், ஏதாவது பொருளை பற்றிப் பிடிக்கும்போதும், வலி அதிகமாகும்.

இந் நோய் ஏன் ஏற்படுகிறது என்பதற்கான காரணம் தெளிவாக தெரியவில்லை. ஆயினும் அந்தத் தசைநாண்களை அளவிற்கு அதிகமாகப் பயன்படுத்துவதலாக இருக்கலாம்.

fea726b0a1185c8a41b3c4a006f87f0b

வலிதான் இந்நோயின் முதலாவதும் முக்கியமானதுமான அறிகுறியாகும். பெருவிரலின் அடிப்பகுதி முதல் மணிக்கட்டுவரை இந்த வலி நீடிக்கும். விரலை ஆட்டி வேலை செய்யும்போது வலி அதிகரிக்கும். அந்த இடத்தில் சற்று வீக்கமும் ஏற்படலாம்.

நாளாந்த வேலைகளின் போது பெருவிரலையும் மணிக்கட்டையும் பயன்படுத்தும் செயற்பாடுகளில் சிரமம் ஏற்படும். விரலை மடக்கும் போது திடீரென இறுகிப் பின்னர் விடுவதுபோன்ற உணர்வு சிலரில் ஏற்படுவதுண்டு.

வலியைத் தவிர பெருவிரல் மற்றும் சுட்டு விரலிகள் மரப்பது போன்ற உணர்வும் சிலரில் ஏற்படுவதுண்டு.

ஆரம்ப நிலையில் அக்கறைப்படுத்தாமல் விட்டால் வலியானது முன்புறமாகப் பெருவிரலுக்கும், பின்புறமாக முன்னங்கையிற்கும் பரவி வேதனை அதிகமாகும்.

எவ்வாறு ஏற்படுகிறது.

பெருவிரலை இயக்கும் இரு தசைநாண்கள் மணிக்கட்டுப் பகுதியில் ஒரு திசுப்படலத்தின் (fascia)  ஊடாகவே செல்கின்றன. அத் தசைநாண்களுக்கு வேலை அதிகரிக்கும்போது அவற்றில் அழற்சி ஏற்பட்டுத் தடிப்பு அடையும். இதுவே நோய்க்கான முக்கிய காரணமாக இருக்கிறது.

இருந்தபோதும் ரூமட்ரொயிட் ஆர்திரைடிஸ் போன்ற மூட்டு நோய்களின் போதும் ஏற்படலாம்.

மணிகட்டிற்கு அல்லது அத்தசைநார்களில் அடிபடுவதால் உட்காயங்கள் ஏற்பட்டு, அதன் விளைவாகவும் இந்நோய் ஏற்பட வாய்ப்பு உண்டு.

எவருக்கும் இந்நோய் ஏற்படலாம் என்றபோதும் 30 முதல் 50 வயதானவர்களிடையே அதிகம் காணப்படுவதாகச் சொல்லப்படுகிறது. அத்தசை நாண்களுக்கு அதிக வேலை கொடுக்கும் பணிகளில் ஈடுபடுபவர்களுக்கு வருவதற்கான சாத்தியம் அதிகம்.

எனவே, தோட்டத்தில் எதையாவது கிண்டுவது வெட்டுவது போன்ற வேலைகள், கொல்ப் டெனிஸ் போன்ற விளையாட்டுக்கள், குழந்தையைத் தூக்குவது போன்றவற்றைத் தொடர்ந்து செய்யும்போது இப் பிரச்சனை தோன்றலாம்.

பெண்களில் இது தோன்றுவது அதிகம். கர்ப்பமாக இருக்கும்போதும் ஏற்படுவதுண்டு. பொதுவாக நடுத்தர வயதினரிடையே எற்பட்ட போதும் பேரப் பிள்ளைகளைப் பராமரிக்கும் வேலை தலையில் வீழ்வதால் சற்று வயதான பெண்களிலும் இங்கு காணமுடிகிறது.

வலி வந்தால் என்ன செய்யலாம்.

உங்களுக்கு எந்தெந்த வேலைகள் செய்தால் வலி எடுக்கிறதோ அவற்றைச் செய்வதைத் தவிருங்கள்.

PJ-AY229_NEWMOM_NS_20101206155220

வலி உள்ள இடத்தில் ஐஸ் வைப்பது வலியையும் வீக்கத்தையும் தணிக்க உதவும்.

வலிநிவாரணி மாத்திரைகளை உட்கொள்ளலாம்.

மணிக்கட்டையும் பெருவிரலையும் ஆடாமல் வைத்து ஓய்வு கொடுப்பதற்கு பன்டேஸ் பண்ணுவது உதவும்.

41QWzK+CvIL._SY300_

இதற்கான splint,  brace  போன்றவை மருந்தகங்களில் கிடைக்கும். இவற்றை பகல் முழுவதும் அணிந்திருக்கலாம்.

TSpica_C7_1-resized-600

வலியைத் தணிப்பதற்கு சில பயிற்சிகள் உதவும். இவை பற்றி கட்டுரையின் இறுதியில் கூறுகிறேன்.

வலியுள்ள இடத்தில் மருத்துவர்கள் ஸ்டிரோயிட் (Steroid) ஊசி மருந்து போடுவதுண்டு. இதுவும் நல்ல பலனைக் கொடுக்கும்.

dm-image

மிக அரிதாக வலி மிகக் கடுமையாக இருந்தால் சத்திரசிகிச்சை செய்யப்படுவதுண்டு. தசைநாணை அழுத்திப் பிடிக்கும் திசுப்படலத்தை வெட்டி இளக்குவதன் மூலம் தசைநாண்களை இலகுவாக அசையவிடுவார்கள்.

De Quervain Tenosynovitis and Surgical Release

பயிற்சிகள்

பல்வேறு விதமான பயிற்சிகள் உள்ளன

xdequer_3

டெனிஸ் பந்தை அழுத்தல் பயிற்சி

வயியுள்ள கையில் ஒரு டெனிஸ் பந்தை பற்றிக் கொள்ளுங்கள். மெதுவாக பந்தின் மீது அழுத்துங்கள்.

15780256(300x300)

வலி ஏற்படவில்லை எனில் அழுத்தத்தை சற்று கூடுதலாகப் பிரயோகியுங்கள். சுமார் 5 செகண்டுகளுக்கு அழுத்தி வைத்திருந்துவிட்டு பின்னர் பிடியைத் தளர்த்துங்கள்.

இவ்வாறு 5 முதல் 10 தடவைகள் செய்யுங்கள். தினமும் 4-5 தடவைகள் இப் பயிற்சியைத் திரும்பச் செய்யுங்கள்

இப பயிற்சியைச் செய்வதற்கு முன்னரும் பின்னரும் அந்த இடத்திற்கு சுடுநீர் ஒத்தடம் கொடுக்கலாம். அதைத் தொடர்ந்து மறு கையால் மெதுவாக அவ்விடத்தை நீவி மசாஜ் பண்ணுவது உதவும்.

முழங்கை மணிக்கட்டு EPL Stretch பயிற்சி

வலியுள்ள பக்கக் கையை முழங்கைப் பகுதியை மடிக்காது, நேராக நீட்டுங்கள். அதே நேரம் பெருவிரலை ஏனைய நான்கு விரல்களும் பொத்தியிருக்குமாறு மூடுங்கள்.

13133256(300x300)

இப்பொழுது உங்கள் மணிகட்டை சின்ன விரல் பக்கமாக படத்தில் காட்டியபடி மெதுவாக மடியுங்கள்.

அப்போது வலி ஏற்படுவதாக உணர்ந்தால் மேலும் மடிப்பதைத் தொடராது நிறுத்துங்கள். 5 செகண்டுகளுக்கு அந்தளவில் வைத்திருங்கள். வலி அதிகரிக்கவில்லை எனில் 5 முதல் 10 தடவைகள் இதே பயிற்சியைத் தொடருங்கள்

மணிக்கட்டுப் பயிற்சி

வலியுள்ள பக்கத்தின் முழங்கையை நேராக நீட்டுங்கள். அக் கையின் பிற்புறத்தை மற்றக் கையால் பற்றி அது மணிக்கட்டுப் பகுதியில் முன்புறமாக வளையுமாறு சற்று அழுத்தம் கொடுங்கள். 10 முதல் 30 செகண்டுகளுக்கு அவ்வாறே பிடித்திருங்கள்.

wrist stretch

அடுத்து நோயுள்ள கையின் பெருவிரல் தவிர்ந்த ஏனைய நான்கு விரல்களையும் மற்றக் கையால் உட்புறமிருந்து வெளிப்புறமாகத் தள்ளுங்கள். 10 முதல் 30 செகண்டுகளுக்கு அவ்வாறே பிடித்திருங்கள். மூன்று தடவைகள் இவற்றை திரும்பச் செய்யுங்கள். தினமும் மூன்று தடவைகள் செய்ய வேண்டும்.

கைலாகுப் பயிற்சி

கைலாகு கொடுக்கும்போது உங்களது மணிக்கட்டு, முன்னங்கை, மற்றும் விரல்கள் ஆகியவற்றின் தசைநார்கள் இறுக்கமின்றி தளர்கின்றன. இது இந்நோய்க்கு நல்ல பயிற்சியாகும். ஆனால் அதற்காக மற்றவர்களின் கைகளை பயற்சிக்காக எதிர்பார்க்க முடியாது.

எனவே உங்களது நோயுள்ள கையால் மற்றக் கையைப் பற்றிப் பயிற்சி செய்யுங்கள். கைகளை இறுக்கமாகப் பற்றாமல் தளர்ச்சியாகப் பற்றிக் கொண்டு கைலாகு கொடுப்பது போல மேல் கீழாக சற்று ஆட்டுங்கள். அதேபோல பக்கவாட்டிலும் சில தடவை ஆட்டுங்கள். இது 30 செகண்டுகள் வரை தொடரலாம்.

மேலும் இரண்டு தடவைகள் செய்யுங்கள்.

இறுதியாக

ஓய்வு மற்றும் பயிற்சிகளின் பயனாக அப் பெண்ணின் மணிக்கட்டு வலி தணிந்து விட்டது. மீண்டும் அத் தசைநார்களுக்கு அதீத வேலை கொடுக்காது கவனம் எடுப்பதாகச் சொல்லியிருப்பதால் மீண்டும் வலி வராது என நம்பலாம்.

டொக்டர்.எம்.கே.முருகானந்தன்.

MBBS(Cey), DFM (Col), FCGP (col)

குடும்ப மருத்துவர்

0.00.0

 

 

Read Full Post »

மருத்துவக் கல்வி கற்கும் மாணவர்கள் அவர்கள். மிகுந்த குதூகலத்துடன் அன்று இருந்தார்கள். காரணம் அன்றுதான் அவர்கள் முதல் முதலாக சத்திரசிகிச்சை அறைக்குள் நுழைந்;திருந்தார்கள். பாரதூரமான சத்திரசிகிச்சை அல்ல. சாதாரண ஹேர்ணியா நோய்தான். சத்திரசிகிச்சை நிபுணர் நோய் பற்றிய விளக்கங்களை மாணவர்களுக்குக் கொடுத்துவிட்டு. கத்தியைக் கையில் எடுத்தார்.

வெள்ளைத் துணியால் மூடப்பட்டிருந்த நோயாளியின் அடிவயிறு மட்டும் வெளியே தெரிந்தது.

ஒரு கீறு.

இரத்தம் கசிந்தது.

உதவியாளர் அதை ஒற்றி எடுக்க முனையும்போது ‘பொத்தடீர்’ என ஒரு சத்தம்.

_wsb_257x176_syncope

 

பார்க்க வந்த மாணவர்களில் ஒருவன் திடீரென மயங்கிவிழுந்து விட்டான். பாடசாலையில் காலை வழிபாட்டு நேரம். ஆசிரியர் திருவாசகத்தில் திளைத்து தன்னை மறந்து நேரம்போவது தெரியாது பேசிக் கொண்டிருக்கையில் ஒரு மாணவி பொத்தென விழுந்துவிட்டாள்.

அதேபோல இராணுவ வீரர்கள் அணிவகுத்து நிற்கும்போது விழுவதும் உண்டு.

article-0-0B67B92A00000578-798_634x476 article-0-0B67B92A00000578-798_634x476

படுக்கையிலிருந்து திடீரென எழும்போது மயங்குதல், திடீரெனத் திரும்பிப் பார்க்கையில் விழுதல், சாமிக்கு வைப்பதற்காக பூ கொய்வதற்காக கழுத்தை நிமிர்த்தியபோது திடீரென விழுதல் போன்ற பல்வேறு உதாரணங்களையும் குறிப்பிடலாம்.

திடீர் மயக்கங்கள்

இவை எல்லாம் திடீர் மயக்கங்கள். மயங்கி விழுந்த வேகத்திலேயே மயக்கம் தெளிந்துவிடுவார்கள். இத்தகைய மயக்கம் தீவிரமான நோய்களின் அறிகுறிகள் அல்ல. பக்கவாதமோ வலிப்பு நோயோ அல்ல.

மருத்துவத்தில் Syncope  எனச் சொல்லப்படும் இவை கணநேரம் மூளைக்கச் செல்லும் ஒட்சிசன் குறைவதால் ஏற்படுவதாகும். Blakout எனப் பொதுவாகச் சொல்லுவார்கள்.

‘இருட்டிக் கொண்டு வந்தது’இ ‘என்ன நடந்தது எனத் தெரியாது திடீரென விழுந்துவிட்டேன்’ என எம்மவர்கள் சொல்லுவார்கள். திடீர் மயக்கம் என நாம் சொல்லலாம்.

இத் திடீர் மயக்கங்கள் பெரும்பாலும் எதிர்பாராது வரும். சிலருக்கு வியர்த்துக்கொண்டோ அல்லது வாந்தியுடன் வரலாம். சில கணங்களுக்குள் விழுந்தவர் தானே விழித்து எழுந்து விடுவார். இவர்களில் பெரும்பாலனர்கள் மற்றவர்களின் எந்த உதவியும் இன்றி தாமாகவே எழுந்து தமது அலுவலைத் தொடரக் கூடியதாக இருக்கும்.

பொதுவான சனத்தொகையில் பத்தில் நான்கு பேருக்கு இத்தகைய மயக்கம் தமது வாழ்நாளில் ஒருமுறையாவது ஏற்பட்டிருக்கும் என்கிறார்கள். இவ்வாறன மயக்கம் ஒருவருக்கு 40 வயதிற்கு முற்பட்ட காலத்திலேயே முதன்முறையாக வரும். 40 வயதிற்கு பின்னர்தான் முதன் முறையாக ஒருவருக்கு இப் பிரச்சனை ஏற்படுகிறது எனில் அது சற்று தீவிரமான நோயின் வெளிப்பாடாக இருக்கலாம்.

பெரும்பாலும் பதின்ம வயதுகளிலேயே முதல் முதலாக வருகிறது. பையன்களை விட பெண் பிள்ளைகளில் வருவது அதிகம்.

காரணங்கள் எவை

பெரும்பாலன இத்தகைய மயங்கங்கள் நரம்பு மண்டலம் சம்பந்தப்பட்டவையே (நெரசயடடல அநனயைவநன ளலnஉழிந -Nஆளு) கடுமையான வலி, மன அழுத்தம், பயம், தீவிர உடற் பயிற்சியின் போன்றவற்றின் போது நிகழ்கின்றன. கடுமையான வாந்தியின்போதும் வருவதுண்டு.

பொதுவாக முகம் வெளிறுவதுடன் வியர்வையும் சேர்ந்து வரலாம். பெரும்பாலவனர்களுக்கு அந்நேரத்திலும் கண்கள் திறந்து இருக்கும். மருத்துவ மாணவன் மயங்கி விழுந்ததற்குக் காரணம் முதன் முறையாக இரத்தம் வெளியேறுவதைக் கண்ட அதிர்ச்சியே ஆகும். அதே மாணவன் பின்னர் திறமையான சத்திரசிகிச்சை நிபுணராக புகழ் பெற்றது ஆச்சரியமான விடயமல்ல.

மற்றொரு முக்கிய காரணம் திடீரென ஒருவரின் இரத்த அழுத்தம் குறைவதால் ஆகும். படுக்கை நிலையில் இருந்து எழுந்திருக்கும்போது அல்லது உட்கார்ந்த நிலையிலிருந்து எழுந்து நிற்கும்போது திடீரென ஒருவரது இரத்த அழுத்தம் குறைவதுண்டு. இதை நிலை சார்ந்த குறை இரத்த அழுத்தம் (Postural hypotension)  என்பர். நீண்ட நேரம் ஒரே இடத்தில் கால்களை அசைக்காது நிற்கும்போதும் இரத்த ஓட்டம் குறைவடைவதால் அவ்வாறு இரத்த அழுத்தம் குறையக் கூடும். பாடசாலை மாணவி விழுந்தது அவ்வாறே ஆகும்.

வயதானவர்களில் இவ்வாறு நிலை சார்ந்த குறை இரத்த அழுத்தம் ஏற்படுவதற்கு பல மருந்துகள் காரணமாக இருப்பதுண்டு.

Senior-CareT1 Senior-CareT1

உயர் இரத்த அழுத்தத்தைக் குறைக்க பயன்படுத்தப்படும் Prazosin, HCT, Atenolol, propranolol  போன்றவை முக்கியமானவை.

அதே போல மனச் சோர்விற்க்கு உபயோகிக்கும் doxepin, imipramine, Amitriptyline  போன்றவையும். ஆண்குறி விறைப்படைதலை ஊக்குவிக்கும் Sildenafil , tadalafil  மருந்துகளும் நிலை சார்ந்த குறை இரத்த அழுத்தத்தை ஏற்படுத்துவதால் சில தருணங்களில் திடீர் மயக்கத்தைக் கொண்டுவருவதுண்டு.

மலத்தை கடுமையாக முக்கி வெளியேற்றும் போது மூச்சை அடக்குவதால் இவ்வாறான மயக்கம் நேரலாம். கடுமையான காய்ச்சல், கடுமையான வயிற்றோட்டம் போன்ற நோய்களால் உடலின் நீர்த்தன்மை குறைவதாலும் மயக்கம் ஏற்படுவதைக் காண்கிறோம். குக்கல் போன்ற கடுமையான இருமலின் போது, மூச்சு விடமுடியாது இரத்தத்தில் ஒஒட்சசிசன் அளவு குறைவதாலும் ஏற்படுவதுண்டு.

கடுமையான வரட்சியால் வியர்வை அதிகம் வெளியேறுவதால் உடலிலுள்ள நீரின் தன்மை குறையும்போதும் இந்நிலை ஏற்படலாம்.

தீவிரமான வேறு நோய்கள்

சற்று தீவிரமான வேறு நோய்களாலும் இவ்வாறான மயக்கங்கள் ஏற்படலாம்.


screen-shot-2014-01-28-at-10-18-24-am

முக்கியமானது வலிப்பு நோயாகும். இதன்போது பொதுவாக மயக்கம் மட்டுமின்றி கை கால்களை இழுப்பதும் நடக்கும். ஆனால் அவ்வாறான இழுப்பு இல்லாத வலிப்புகளும் உண்டு என்பதையும் கவனத்தில் கொள்ள வேண்டும்.

திடீரென இரத்தத்தில் சீனியின் அளவு குறையும்போதும் மயக்கம் ஏற்படுவதுண்டு. இது நீரிழிவு நோயுடன் தொடர்புடையது. நீரிழிவு நோய்க்காக இன்சுலின் ஊசி, அல்லது மாத்திரைகள் எடுப்பவர்களிடையே தினமும் எடுக்கும் மாத்திரை அல்லது ஊசியின் அளவை தவறுதலாக கூடுதலாக எடுத்தால் நடக்கலாம். அவர்கள் விரதங்கள் இருப்பதாலும் நேரலாம். நீரிழிவு நோயாளிகள் விரதங்கள் இருப்பதும் உணவுகளைத் தவறவிடுவதும் கூடாது.

திடீரென ஏற்படும் அதிகமான இரத்தப் பெருக்கு மற்றொரு காரணமாகும். உதாரணமாக காயத்தினால் கடுமையாக குருதி வெளியேறுவது, கடுமையான மாதவிடாய் பெருக்கு, மூலத்திலிருந்து திடீரென இரத்தம் ஓடுதல் மற்றும் வெளிப்படையாகத் தெரியாது உடலின் உள்ளே நடக்கும் குருதிப்பெருக்குகள் காரணமாகவும் நடக்கலாம்.  உதாரணமாக- குடற்புண், ஈரல் சிதைவு, புற்றுநோய்கள் எனப் பலவாகும்.

தலையில் கடுமையான அடி படுதல், அதிகமாக மது அருந்துதல், திடீரெனத் தோன்றி மறையும் பக்கவாதம் (transient ischaemic attacks) போன்றவை வேறு முக்கிய காரணங்களாகும்.

syncope-4-638

எனவே காரணம் எதுவாக இருந்தாலும் திடீர் மயக்கம் ஏற்பட்டால் மருத்துவ ஆலோசனை பெறுவதன் மூலம் அது ஆபத்தான நோயின் வெளிப்பாடு அல்ல என்பதை நிச்சயத்துக் கொள்ளலாம்.

உங்கள் வீட்டில் ஒருவருக்கு திடீர் மயக்கம் ஏற்பட்டால் மேற் கூறிய எவையாவது காரணமாக இருக்கக் கூடும். மருத்துவரிடம் செல்லும்போது, இவற்றில் ஏதாவது காரணமாகலாம் என நீங்கள் சந்தேகித்தால் அவரிடம் மறக்காமல் சொல்லுங்கள். மயக்கமுற்றவர் வழமையாக உட்கொள்ளும் மருந்துகள், அவற்றின் அளவுகள் ஆகியவற்றையும் மருத்துவருக்கு அறியத்தாருங்கள்.

மருத்துவம்

சாதாரண மயக்கங்கள் தாமாகவே குணமாகிவிடும் என்பதை அறிந்தோம். மயக்கங்களுக்கு வேறு காரணங்கள் இருப்பின் அவற்றைக் கண்டறிந்து நிவர்த்தி செய்ய மருத்துவர் வழி கூறுவார்.

fainting_im1

மயக்கம் வருவது போலிருந்தால் என்ன செய்யலாம்.

நிற்கவோ இருக்கவோ செய்யாது உடனடியாக அந்த இடத்திலேயே படுங்கள். முடியுமானால் கால்களை ஒரு நாற்காலியில் உயர்த்தி வையுங்கள்.

மயக்கம் தெளிந்தாலும் உடனடியாக திடீரென எழுந்து நிற்காதீர்கள். சற்று தலையை உயர்த்தி உட்கார்ந்து பாருங்கள். சுகமாக இருந்தால் மட்டும் எழுந்திருங்கள்.

போதிய நீராகாரம் எடுப்பதும், மதுபானத்தைத் தவிர்பதும், காலுக்கு ஸ்டொகிங் அணிவதும், இதைத் தடுப்பதற்கு உதவும்.

டொக்டர்.எம்.கே.முருகானந்தன்.

MBBS(Cey), DFM (Col), FCGP (col)

குடும்ப மருத்துவர்

0.0.0

 

Read Full Post »