Feeds:
பதிவுகள்
பின்னூட்டங்கள்

Archive for the ‘மருந்துகள்’ Category

‘காலை எழுந்தவுடன் படிப்பு’ என்றான் பாரதி. காலை எழுந்தவுடன் குளிசை என்று பல முதியவர்கள் மருந்துப் போத்தல்களைத் திறக்கிறார்கள். மிகுதிப் பேர் ‘மாலையில் படுக்கையில் சரியும் முன்னர் மாத்திரை’ என முணுமுணுக்கிறார்கள்.

நீரிழிவு கொலஸ்டரோல், தைரெயிட் நோய்களைப் போன்ற பல நோய்கள் போலவே பிரஸர் நோய் உள்ளவர்களும் தொடர்ந்து மருந்து சாப்பிடுவது அவசியம். மருத்துவர் சிபார்சு செய்யத குறிப்பிட்ட மருந்தைக் குறிப்பட்ட அளவில் குறிப்பட்ட நேரத்தில் உட்கொள்ள வேண்டும். அலுக்காமல் சலிக்காமல் தொடர்ந்து சாப்பிட வேண்டும்.

பிரஸர் மருந்துகளை உட்கொள்வதற்கான சிறந்த நேரம் எது. காலையா, இரவா, மதியமா?

பிரசரால் ஆபத்துகள் எவ்வேளையில்

இதற்கான விடையைத் தேடு முன்னர் பிரஸர் பிரச்சனையால் ஏற்படுகின்றன ஆபத்தான பின் விளைவுகள் எவை அவை எந்த நேரத்தில் ஏற்படகின்றன என்பதை அறிந்து கொள்வது மிக அவசியமாகும்.

இருதய நோய்களால் ஏற்படும் மரணங்களை ஆராய்ந்த போது அவற்றில் 70 சதவிகிதமானவை காலை 7 மணி முதல் 9 மணிக்குள் நிகழ்வதாக மிகப் பிரபலமான குசயஅiபொயஅ ஆய்வு கூறியது. மற்றொரு ஆய்வானது மாரடைப்புகளில் 40 சதவிகிதமானவை காலை 6 மணியிலிருந்து 12 மணிக்கிடையில் நிகழ்வதாக எடுத்துக் காட்டியிருந்தது. அதே போல பக்கவாதம் மற்றும் இருதயத் துடிப்பு  ஒழுங்கீனங்கள் ஆகியவையும் காலையிலேயே நிகழ்வதாக தரவுகள் கூறுகின்றன.

இவ்வாறு நிகழ்வதற்குக் காரணம் என்ன? எமது உயிரியல் கடிகாரத்தில் ஏற்படும் சில மாற்றங்களால் பிரஸரானது காலையில் விழித்து எழும் போதும், அதைத் தொடரும் காலை நேரத்திலும் சற்று அதிகரிக்கிறது. அத்துடன் காலை விழித்தெழும் நேரத்தில் இரத்தக் குழாய்கள் இறுக்கமடைகின்றன குருதியின் அளவிலும் சற்று ஏற்றம் தென்படுகிறது.

மருந்துகளைப் பயன்படுத்தல்

அதே நேரம் இன்று பொதுவாகப் பயன்படுத்தப்படும் பெரும்பாலான பிரஷர் மருந்துகளை ஒரு தடவை உட்கொண்டாலே போதுமாக இருக்கிறது. அதற்கு ஏற்றவாறே அவை தயாரிக்கப்படுகின்றன. அதாவது அவற்றை ஒரு தடவை உட்கொண்டால் அடுத்த 24 மணிநேரத்திற்கு பிரஷரைக் குறைக்கக் கூடியவையாக இருக்கின்றன.

உட்கொண்ட ஒரு மணி நேரத்தின் பின் அவை செயற்படத் தொடங்கும், 4 முதல் 15 மணிநேரத்தில் அவற்றின் செயற்பாடு உச்சநிலையில் இருக்கும். அதன் பின் அதன் தாக்கம் படிப்படியாகக் குறையத் தொடங்கும்போது அடுத்த நேர மருந்தை எடுக்கின்ற வேளை வந்துவிடும்.

எந்த வேளை நல்ல வேளை

எனவே இரவில் பிரஸர் குளிசைகளைப் உட்கொண்டால் பிரஷர் அதிகரிக்கும் தருணமான அதிகாலையில் மருந்தின் செயற்பாடு உச்ச கட்டத்தில் இருக்கும் அதனால் மேலும் பிரஷர் அதிகரிக்காமல் தடுத்துவிடும்.

எனவேதான் இரவில் பிரஸர் குளிசைகளைப் போடுவது சிறந்தது எனச் சிலர் கருதுகிறார்கள்.

ஆனால் இரவு நேரத்தில் எடுப்பதைவிட காலையில் எடுத்தபோது மாரடைப்பு பக்கவாதம் போன்றவற்றை குறைத்தன என சில ஆய்வுகள்; கூறின. இவை பிரஷருக்கான சிகிச்சை பற்றிய பொதுவான ஆய்வுகள் ஆகும். காலையா மாலையா மருந்தப் போடப் பொருத்தமானது என்பதை இலக்காகக் கொண்டு செய்யப்பட்டவை அல்ல.

இருந்தபோதும் quinapril என்ற மருந்தை கொடுத்து செய்யப்பட்ட ஆய்வானது இரவில் கொடுப்பது நல்லது என்ற முடிவைத் தந்தது. அதே நேரம் atenolol, nifedipine , amlodipine.போன்ற மருந்துகளைக் கொடுத்து செய்யப்பட்ட ஆய்வுகள் காலையா இரவா என்பது பற்றி எந்தத் தெளிவான முடிவையும் தரவில்லை.

எனவே மருத்துவ ஆய்வுகளின் முடிவுகளின் படி எந்த முடிவையும் இப்பொழுது எடுக்க முடியாதிருக்கிறது.

வேறு காரணங்கள்

பிரஷர் மருந்துகளைத் தினந்தோறும் தவறாது எடுப்பது முக்கியமானது. காலையில் மாலையில் அல்லது எந்த ஒரு குறிப்பட்ட நேரத்தில்தான் தப்பாமல் எடுக்க வேண்டும் என்று எண்ணி வேளை தப்பினால் போடாமல் விட்டு விடக்கூடாது.

தவற விடுவதைவிட அவருக்கு உசிதமான நேரத்தில் போடுவதால் ஓரளவேனும் பலன் அளிக்கும். சிலருக்கு காலையில் தேநீருடன் போடுவது மறக்காத தருணமாக இருக்கும். வேறு சிலருக்கு வேலை எல்லாம் முடித்து இரவில் படுக்கப் போகும் நேரமே தவறாமல் எடுக்கக் கூடியதாக இருக்கும்.

எனவே ஒருவரது வாழ்க்கை முறை மற்றும் விருப்புகளுக்கு ஏற்றபடி எடுப்பதே உசிதமாகப் படுகிறது.

இருந்தபோதும் அவ்வாறு எடுப்பதையிட்டு மருத்துவருடன் பேசி முடிவெடுத்துச் செய்வதே நல்லது.

உதாரணமாக புரசசீன் போன்ற அல்பா புளக்கர் வகை மருந்துகள் கிடை நிலையிலிருந்து எழுந்திருக்கும்போது திடீரெனப் பிரசரைக் குறைத்து தலைசுற்றை ஏற்படுத்தலாம். முக்கியமாக வயதானவர்கள் இரவில் சிறுநீர் கழிக்க அல்லது வேறு காரணங்களுக்காக படுக்கையை விட்டு எழ நேர்ந்தால் தலைச்சுற்று ஏற்பட்டு விழுந்துவிடவும் கூடும்.  எனவே அவர்கள் அத்தகைய மருந்துகளை இரவில் போடுவதைவிட காலையில் போடுவது நல்லது.

பிரஷருக்கான சில மருந்துகள் சிறுநீரை அதிகம் கழியச் செய்யும். அத்தகைய மருந்துகளை இரவில் உட்கொண்டால் அடிக்கடி சிறுநீர் கழிக்க நேருவதுடன் தூக்கத்தையும் குழப்பும். அத்தகைய மருந்துகளை இரவில் உட்கொள்வதைத் தவிர்க்க வேண்டும்.. hydrochlorothiazide, amiloride, furosemide  போன்றவை சில உதாரணங்களாகும். மருத்துவர்கள் அவற்றை காலையில் உட்கொள்ளுமாறு அறிவுறுத்துவார்கள்.

குருதிச் சீனியின் அளவை அதிகமாகக் கூட்டவோ கடுமையாகக் குறைக்கவோ செய்யக் கூடிய சாத்தியம் இருப்பதால் அற்றனலோல், போன்ற டீ டிடழஉமநச வகை பிரஷர் மருந்துகளை இரவில் போடாது தவிர்ப்பது நல்லது.

இறுதியாக 

ஆனால் எல்லா பிரஷர் மருந்துகளும் ஒரு வேளை மட்டும் உட்கொளள்ளப்படுபவை அல்ல. இரண்டு நேரம் அல்லது மூன்று தடவைகள் போடப்படுபவையும் உண்டு.

பலருக்கு ஒன்றிற்கு மேற்பட்ட வகை பிரஷர் மருந்துகளை உபயோகிக்க வேண்டி நேரலாம். பிரஷரைக் கட்டுப்படுத்துவதற்கு மட்டுமே மூன்று அல்லது நான்கு வேறு வகையான மருந்துகளை உட்கொள்வது அவசியமாகலாம்.

அவ்வாறு போடப்படும்போது அவற்றை பொதுவாக ஒரே நேரத்தில் சேர்த்துப் போடுவதில்லை. பிரித்துப் உட்கொள்ளுமாறு அறிவுறுத்துவார்கள்.

அத்தகைய தருணத்தில் எதை எதை எந்த நேரத்தில் போட வேண்டும் என்பதையிட்டு மருத்துவர் தெளிவான அறிவுறுத்தல்களைத் தருவார்கள். அதன்படி செய்யுங்கள்

ஒரு மருந்தை மட்டும் தரும்போது பொதுவாக பிரஷர் மருந்துகளை இரவில் மட்டும் உட்கொள்ளக் கொடுப்பதையே அதிகம் காண்கிறோம்.

எனவே நீங்களாக முடிலெடுக்காமல் மருத்துவ ஆலொசனையுடன் பிரஷர் மருந்துகள் போட வேண்டிய நேரங்களைத் தேர்ந்தெடுங்கள்.

டொக்டர்.எம்.கே.முருகானந்தன்.

MBBS(Cey), DFM (Col), FCGP (col)

குடும்ப மருத்துவர்

0.0.0.0

 

Advertisements

Read Full Post »

>

அவருக்கு மிகுந்த அதிர்ச்சியாகவும் ஆச்சரியமாகவும் இருந்தது நான் சொன்னதைக் கேட்டு. ஆனால் நானாக எதுவும் சொல்லவில்லை. அவர் தந்த இரத்தப் பரிசோதனை ரிப்போட்டுகளை வைத்துத்தான் கருத்துச் சொன்னேன்.

“உங்களுக்கு கொலஸ்டரோல் அதிகமாக இருக்கு” இதுதான் நான் சொன்னது.

அவர் ஆச்சரியப்பட்டதிலும் நியாயம் இருக்கிறது.

அவர் தனது உணவு முறைகளில் மிகுந்த அக்கறை உள்ளவர். அத்துடன் ஒரு வெஜிடேரியன். கொழுப்புள்ள உணவுகளைத் தவிர்த்து காய்கறிகளையும் பழங்களையும் அதிகம் சாப்பிடுபவர். தினசரி நடைப்பயிற்சி செய்வதாகவும் சொன்னார்.

“அம்மாவிற்கு கொலஸ்டரோல் இருந்து, ஹார்ட் அட்டக் வந்து இறந்தபடியால் நான் வலு கவனமாக இருந்தனான். இருந்தும் எனக்குக் கொலஸ்டரோல் வந்து விட்டதே” எனக் கவலைப்பட்டார்.

“நீங்கள் இவ்வளவு கவனமாக இருந்தபடியால்தான் உங்களுக்கு 45 வயதுவரை கொலஸ்டரோல் பிரச்சனை வராமல் தப்பியிருக்கிறீர்கள்.” என்றேன் நான்.

உண்மையில் மாரடைப்பிலிருந்தும் தப்பியிருக்கிறார். தனது ஆரோக்கியமான வாழ்க்கை முறையைத் தொடர்ந்தும் கடைப்பிடித்தால் எதிர்காலத்திலும் தப்பிவிடுவார்.

உணவுமுறை மட்டுமே காரணமல்ல

ஒருவரது கொலஸ்டரோல் வகைளில் முக்கியமானது கெட்ட கொலஸ்டரோல் என்று சொல்லப்படும் LDL கொலஸ்டரோலும், ரைகிளிசரைட் (triglygeride) கொலஸ்டரோல் ஆகிய இரண்டுமாகும்.

  • இவை அதிகரிப்பிற்கு உணவு தவிர்ந்த ஏனைய காரணிகள் 75 சதவிகிதமாக இருக்கின்றன. 
  • ஆனால் உணவு சார்ந்த காரணிகள் 25 சதவிகிதம் மட்டுமே.
ஏனைய காரணிகள்

குருதியில் கொலஸ்டரோல் அதிகரிப்பதற்கு உணவு தவிர்ந்த ஏனைய காரணிகளின் பங்களிப்பு பின்வருமாறு இருக்கிறது.

  1. பரம்பரை அம்சங்கள் 15 சதவிகிதம்,
  2. அதிகரித்த எடை 12 சதவிகிதம்,
  3. ஹோர்மோன்களும் நொதியங்களும் 8 சதவிகிதம்,
  4. உயர் இரத்த அழுத்தம் 8 சதவிகிதம்,
  5. அதிக மது பாவனை 2 சதவிகிதம்,
  6. மனப்பழுவும், உணர்ச்சி நிலைகள், சமூக பொருளாதார நிலையும் 8 சதவிகிதம்,
  7. நீரிழிவு 7 சதவிகிதம்,
  8. உடலுழைப்பற்ற வாழ்க்கை முறை 6 சதவிகிதம்,
  9. புகைத்தலும், சூழல் மாசுக்களும் 6 சதவிகிதம்,
  10. ஆணா பெண்ணா என்பது, வயது அதிகரிப்பு, சிலவகை மருந்துகள், போன்றஏனைய பல காரணிகள் 5 சதவிகிதம்

எனச் சொல்லப்படுகிறது.

பரம்பரை அம்சத்தின் பங்கு

இவற்றில் மிக உயர்ந்த அளவான 25 சதவிகிதத்தைக் கொண்டிருப்பது உணவுமுறைகளே. எனவே எமது குருதியில் கொலஸ்டரோல் அளவு அதிகரிப்பிற்கு மிக முக்கிய காரணம் தவறான உணவுமுறைகள்தான் என்பதில் ஐயமில்லை.

ஆனால் அதற்கு அடுத்து இருப்பது பரம்பரை அம்சங்களாகும். இது 15 சதவிகிதம் வரை கொலஸ்டரோல் அதிகரிப்பிற்குக் காரணமாக இருக்கிறது.

மேற் கூறிய நோயாளி எவ்வளவு கவனமாக இருந்தும் கொலஸ்டரோல் அதிகரித்ததற்குக் காரணம் அவரது தாயாருக்கும் கொலஸ்டரோல் இருந்ததாகக் கொள்ளலாம்.

கொலஸ்டரோல் அதிகரிப்பிற்கு மாத்திரமின்றி நீரழிவு, பிரஸர், மாரடைப்பு, ஒஸ்டியோபொரோசிஸ், சில வகை புற்றுநோய்கள் போன்ற பல்வேறு நோய்களுக்கும் பரம்பரை அம்சங்கள் காரணமாகின்றன.

ஒருவரது தாய், தகப்பன், சகோதரங்கள் போன்ற நெருங்கிய உறவினர்களில் அவ்வாறான நோய்கள் இருந்தால் இவர்களுக்கும் வருவதற்கான சாத்தியம் அதிகமாகும். 

மருந்துகளை நிறுத்தல்

மற்றொருவருக்கும் கொலஸ்டரோல் இருந்தது. மருந்துகள் சாப்பிட்டார். மூன்று மாதங்களுக்குப் பின்னர் கொலஸ்டரோல் ரிப்போட்டுடன் வந்தார்.

“உங்கள் கொலஸ்டரோல் அளவு சாதாரண நிலைக்கு வந்துவிட்டது” என்றேன்.

முகத்தில் ஆனந்தம் தாண்டவமாடியது. “அப்ப மருந்தை நிப்பாட்டலாம்தானே” எனக் கேட்டார்.

  • “உணவு முறைகளைச் சரியாகக் கடைப்பிடித்துடன், உங்களால் கட்டுப்படுத்தக் கூடிய ஏனைய வாழ்க்கை முறைகளான 
  • தினசரி உடற் பயிற்சி, 
  • நாற்காலியில் உட்கார்ந்திருப்பது போலன்றி உடல் உழைப்புடன் கூடிய வாழ்க்கை, 
  • மது புகைத்தல் ஆகியவற்றை நிறுத்தல், 
  • நீரிழிவு பிரஸர் போன்றவற்றைக் கட்டுப்படுத்தல், 
  • மனஅமைதியான வாழ்க்கை முறை 

என வாழ்ந்தால் கொலஸ்டரோல் தானே குறைவதற்கான சாத்தியம் உள்ளது. ஆனால் அது முக்கியமாக ஆரம்ப நிலையில் மாத்திரமே சாத்தியமாகும்.

ஆனால் உங்கள் வயதையோ, நீங்கள் ஆணா பெண்ணா என்பதையோ மாற்ற முடியுமா? அதேபோல உடலிலுள்ள ஹோர்மோன்களையும் நொதியங்களையும் உங்களால் மாற்ற முடியாது.

வேறு நோய்களுக்கான எல்லா மருந்துகளையும் நிறுத்த முடியுமா? அவ்வாறு செய்தால் கொலஸ்டரோலை மருந்துகள் இன்றிக் குறைக்க வாய்ப்பு உள்ளது.” என்ற விளக்கத்தை அளித்தேன்.

“ஒரு ஆணைப் பெண்ணாக மாற்றுவதைத் தவிர வேறு எதையும் செய்யக் கூடிய அதிகாரம் எனக்கு இருக்கிறது.” இவ்வாறு கூறியவர் மறைந்த ஜனாதிபதி ஜே.ஆர்.ஜயவர்த்தனா.

ஆனால் அவராலும் அவரது வயதையோ, முதுமையையோ, மரணத்தையோ மாற்ற முடியவில்லை. இவற்றுடன் பரம்பரை அம்சங்களையும், குடும்பக் குணாதிசியங்களையும், கொலஸ்டரோலையும் இணைத்துக் கொள்ளலாம்.

தொடர்ந்த இரத்தப் பரிசோதனைகளும் மருத்துவ ஆலோசனையும்

இவை முடியாது என்பதால் கொலஸ்டரோல் மாத்திரைகளைத் தொடர்ந்து உபயோகிக்க வேண்டும். ஆனால் மருத்துவர் ஒரு முறை எழுதித் தந்த மாத்திரைகளை தொடர்ந்து பாவிக்க முடியாது.

மூன்று அல்லது ஆறு மாதங்களுக்கு ஒரு முறை இரத்தப் பரிசோதனை செய்து அதிலுள்ள மாற்றங்களுக்கு எற்ப மருந்துகளின் அளவுகளிலும், வகையிலும் மாற்றங்கள் செய்ய நேரலாம்.

அவ்வாறு காலக்கிரமத்தில் இரத்தப் பரிசோதனைகள் செய்வது கொலஸ்டரோல் குறைந்திருக்கிறதா என்பதைக் கணிக்க மாத்திரமல்ல, தொடர்ந்து மருந்துகள் உபயோகிப்பதால் உடல் நலத்திற்கு வேறு கேடுகள் இருக்கிறதா என்பதை அறியவும்தான். இதனால் தொடர்ந்து மருந்துகள் உபயோகிப்பதால் வேறு உடல்நலக் கோளாறுகள் ஏற்படும் சாத்தியமும் இல்லை.

எனவே கொலஸ்டரோல் பிரச்சனைக்கு

  • மருந்துகள் தேவையா இல்லையா, 
  • எந்த மருந்து தேவை, 
  • எவ்வளவு காலத்திற்கு தேவை 

என்பதை தீர்மானிக்கும் பொறுப்பை உங்கள் மருத்துவரிடம் விட்டுவிடுங்கள்.

ஆனால் அவை பற்றிய உங்கள் சந்தேகங்களை மருத்துவரிடம் கேட்கும் உரிமை உங்களுக்கு உள்ளது என்பதை மறந்து விடாதீர்கள். உங்கள் சந்தேகங்களுக்கு விடையளிக்க வேண்டிய கடப்பாடு அவருக்கு உள்ளது.

நிறைவேற்று அதிகாரம் உள்ளவர்களும் மக்களின் உரிமைகளை மதிக்க வேண்டியுள்ளது அல்லவா? அது போலத்தான்.

கொலஸ்டரோல் மற்றும் மாரடைப்பு பற்றிய எனது முன்னைய பதிவுகளுக்கு கீழே கிளிக் செய்யுங்கள்.

‘இருக்கிறம்’ சஞ்சிகையில் வெளியான எனது மருத்துவக் கட்டுரை.

டொக்டர்.எம்.கே.முருகானந்தன்.
0.0.0.0.0

Read Full Post »

>வலி நிவாரணிகள் பற்றி நிறையத் தப்பபிப்பிராயங்கள் இருக்கின்றன.

வெளிநாட்டிலிருந்து வந்த நபர் ஒருவர் கடுமையான  இடுப்புவலியால் துன்பப் பட்டுக்கொண்டிருந்தார். ஆனால் தனக்கு Pain Killer மருந்து வேண்டவே வேண்டாம் என அடம்பிடித்தார்.

அதே வேளை முழங்கால் வலியுள்ள ஒரு அம்மா Diclofenac Sodium  என்ற வலிநிவாரணி மாத்திரையை எந்த மருத்துவரின் சிபார்சுமின்றி மாதக்கணக்கில் தானாகவே உபயோகித்துக் கொண்டிருந்தார்.

இருவரும் தவற்றையே செய்கிறார்கள்.

வலிநிவாரணிகள் (Pain Killers)  எனப் பொதுவாக அழைத்தாலும் இவை ஆங்கிலத்தில் Non-steroidal anti-inflammatory drugs  என்றே மருத்துவத்தில் அழைக்கப்படுகிறது.

சுருக்கமாக  NSAID என்பார்கள். ஸ்டிரொயிட் அல்லாத வலிநிவாரணிகள் எனலாம்.

பொதுவாக வலிநிவாரணி என அழைத்தாலும் இவை முக்கியமாக மூன்று வகைகளில் பயன் தருகின்றன.

இவை வாயினால் உட்கொள்ளக் கூடிய மாத்திரைகளாகவும், சிரப் மருந்துகளாகவும், கூட்டுக் குளிசைகளாகவும் (Capsules) கிடைக்கின்றன. அதேவேளை மலவாயிலில் உட்செலுத்தும் மருந்துகளாக (suppository) மற்றும் ஊசி மருந்துகளாகவும் (Injections)  அவசியமானபோது மருத்துவர்களால் உபயோகிக்கப்படுகின்றன.

மருத்துவப் பயன்கள்

இவை பலவகையான மருத்துவப் பிரச்சனைகளுக்கு அடிக்கடி பயன்படுத்தப்படுகின்றன.

•    வலி – குத்து, வலி, உழைவு, நோ எனப் பலவாறு அழைக்கப்படும் எல்லா வலி சார்ந்த அசௌகரியங்களையும் குறைக்கினறன. தசைப்பிடிப்புகள், தலைவலி, உடல்வலி, மாதவிடாய்க் குத்து, வயிற்று வலி, சிறுநீரகக் குத்து போன்ற அனைத்தையும் நீக்கும் ஆற்றல் இவற்றிற்கு உண்டு.

•    காய்ச்சலைத் தணிக்வும் இவை பயன்படுத்தப்படுகிறன.
•    அழற்சியைத் தணிக்க உதவும். உதாரணமாக மூட்டு வாதங்களின் (Rhematoid Arthritis)  போது அவை அழற்சியுற்று வீங்கிச், சிவந்து, வலியைக் கொடுக்கும். இந்த அழற்சியைத் (inflammation) தணிக்கும் ஆற்றல் வலிநிவாரணிகளுக்கு உண்டு.
•    மாதவிடாயின் போது கடுமையான குருதிப் பெருக்கு இருந்தால் அதைக் கட்டுப்படுத்தும் ஆற்றலும் இவைக்கு இருக்கிறது.
எனவே இவை மிகுந்த பயனுள்ள மருந்துகள் என்பதில் சந்தேகம் இல்லை. ஆயினும் அவற்றை எழுந்தமானத்திற்கு உபயோகிக்கக் கூடாது. அவற்றிற்கு பல பக்க விளைவுகள் உள்ளன.

அதிகம் ஏற்படும் பக்க விளைவுகள்

•    நெஞ்செரிப்பு
•    இரைப்பைப் புண்

சிலவேளைகளில் ஏற்படும் பக்க விளைவுகளாவன

இரைப்பையில் ஏற்படும் புண்கள் மோசமாகி பின்வரும்  விளைவுகள் ஏற்படலாம்.
•    இரைப்பைப் புண்ணிலிருந்து இரத்தம் கசிதல்
•    இரத்தசோகை – அவ்வாறு தொடர்ந்து இரத்தம் கசிவதால் ஏற்படும்
•    இரைப்பையில் அல்லது உணவுக் கால்வாயில் துவாரம் விழுதல்.
மிகக் குறைவாக ஏற்படும் பக்க விளைவுகளாவன
•    உயர்இரத்த அழுத்தம்
•    இருதய வழுவல் (Heart Failure)
•    மாரடைப்பு

சிறுநீரக வழுவல், ஈரல் பாதிப்பு போன்ற மிக ஆபத்தான விளைவுகளையும் ஏற்படுத்தலாம். ஆனால் மிகக் குறைவாகவே இத்தகைய பாதிப்பு ஏற்படுகிறது. ஏற்கனவே சிறுநீரக அல்லது ஈரல் நோய் இருப்பவர்களே அத்தகைய பாதிப்பிற்கு உள்ளாகிறார்கள்.

எனவே இத்தகைய மருந்துகளை மருத்துவ ஆலொசனை இன்றி உபயோகிப்பது நல்லதல்ல. அவ்வாறு உபயோகிக்கும்போதும் சிபார்சு செய்ததை விட அதிக காலத்திற்கு உபயோகிக்கக் கூடாது.

அவதானம் தேவைப்படுவோர்

கீழ்க்கண்ட பாதிப்புள்ளவர்கள் வலிநிவாரணிகளை உபயோகிப்பதில் மேலதிக அவதானம் தேவை. இல்லையேல் இரப்பை புண் ஏற்படும் ஆபத்து அதிகமாகும்
•    ஏற்கனவே நெஞ்செரிப்பு, புகைச்சல், வயிற்று வலி போன்ற உணவுக் கால்வாய்ப் பிரச்சனை உள்ளவர்கள்
•    நீரிழிவு, உயர்இரத்த அழுத்த நோய், இருதய நோயுள்ளவர்கள்
•    65 வயதிற்கு மேற்பட்டவர்கள்
•    புகைத்தல், அதிக மது பாவனையாளர்கள்
•    அதிக அளவிலும், நீண்ட காலத்திற்கும் வலிநிவாரணி உபயோகிப்பவர்கள்

ஆஸ்த்மா நோயை சில தருணங்களில் தீவிரமாக்கலாம் என்பதால் அவர்கள் வலிநிவாரணிகளை அவதானத்துடன் உபயோகிக்க வேண்டும்.

கர்பமாயிருக்கும்போதும், கர்ப்பம் தரிப்பதை எதிர்நோக்கியிருக்கும் காலங்களிலும், பாலுட்டும் காலத்திலும் மருத்துவ ஆலோசனை இன்றி உபயோகிக்கக் கூடாது.

பல நாடுகளில் பின்வரும் வலிநிவாரணிகள் ibuprofen,  naproxen, and  aspirin.  மருத்துவ ஆலோசனையின்றி நோயாளிகள்  தாங்களே வாங்கி உபயோகிக்க முடியும்.

ஆயினும் diclofenac, indomethacin,  mefenamic acid, meloxicam, celecoxib, nabumetone போன்றவற்றை மருத்துவ ஆலோசனையின்றி உபயோகிக்க முடியாது.

வலிநிவாரணிகளை உபயோகிப்பதில் சிக்கல் உள்ளவர்கள் பரசிட்டமோல் (Paracetamol) மாத்திரைகளை பயமின்றி உபயோகிக்க முடியும்.

நான் எழுதி தினக்குரல் பத்திரிகையின் ஹாய் நலமா பத்தியில் 14.09.2010 வெளியான கட்டுரையின் மீள்பதிவு.

டொக்டர்.எம்.கே.முருகானந்தன்.

Read Full Post »

>அதீத எடை என்பது ஒரு உலகளாவிய பிரச்சனையாகிவிட்டது. மேற்கத்தைய நாடுகளில் மட்டும் பேசப்பட்ட இவ்விடயம் இப்பொழுது ஆசிய நாடுகளிலும் தனது அழுக்கு முகத்தைக் காட்டத் தொடங்கிவிட்டது.

அதீத எடையின் விளைவுகளும் குறைக்கும் வழிகளும்

எடை அதிகரிப்பதால் நீரிழிவு, உயர் இரத்த அழுத்தம், இருதயநோய்கள், எலும்பு மூட்டுத் தேய்வுகள், போன்ற பல நோய்கள் வரும் என்பதை இப்பொழுது பலரும் உணர்கிறார்கள்.

உணவுக்கட்டுப்பாடு, உடற்பயிற்சி போன்ற வாழ்க்கை முறை மாற்றங்கள் அவசியம் என்ற உணர்வு மேலாங்கி வருகிறது.

காலையில் வீதிகளிலும் கடற்கரை ஓரங்களிலும் நடைப் பயிற்சி செய்பவர் எண்ணிக்கை அதிகரிப்பிலிருந்து இதனை அறிய முடிகிறது.
இளவயதினர் பெரும்பாலும் உடற்பயிற்சி நிலையங்களை நாடுகிறார்கள்.

ஆனால் மிகப் பெரும்பாலானவர்கள் இது பற்றிய எவ்வித உணர்வும் இன்றி சதா காலமும் வாய்க்குள் எதையாவது போட்டு மென்று கொண்டே இருக்கிறார்கள்.

இதனால் அவர்களது எடை அதிகரிக்கிறது. மேற் கூறிய நோய்கள் வந்து சேர்வதை தடுக்க முடியாது போய்விடுகிறது. நோயினால் ஏற்படும் உபாதைகள் தாக்கத் தொடங்கிய பின்னரே அதைக் குறைக்க வேண்டும் என்ற எண்ணம் வருகிறது.

ஆயினும் இத்தனை காலமும் சோம்பிக் கிடந்த உடலும், மென்று கொண்டெ இருந்த வாயும் சொல்வழி கேட்கின்றனவா?

எடையைக் குறைக்க வேறுவழிகள்

எடையைக் குறைக்க வேறு ஏதாவது வழி இருக்கிறதா என அப்படிப்பட்டவர்கள் கேட்கிறார்கள்.

நிச்சயம் மருந்துகள் இருக்கவே செய்கின்றன.

மிகத் தீவிரமாகக் குறைக்க வேண்டியவர்களுக்கு சத்திரசிகிச்சையும் உண்டு.

சத்திரசிகிச்சை

Gastroplasty என்ற சிகிச்சை முறை உண்டு. இரைபையை வெட்டிச் சிறியதாக்குவதால் கொஞ்சமாக உணவை உட்கொண்டதுமே வயிறு நிறைந்த உணர்வைக் கொடுக்கும்.

ஆயினும் இது முற்றிலும் பாதுகாப்பான சத்திரசிகிச்சை என்று சொல்ல முடியாது. இச் சத்திரசிகிச்சைக்குப் பின் இலங்கையில் ஒரு பெண் இறந்த செய்தி பத்திரிகைகளில் பரவலாக அடிபட்டது ஞாபகம் இருக்கலாம்.

மருந்துகள்

தமது எடையைக் குறைக்க, சுய முயற்சி இன்றி, மருந்துகளின் உதவியை நாடுகிறார்கள்.

எடை குறைப்பு மருந்துகளை உபயோகிக்கும் வரைதான் எடை குறையும். அத்துடன் உணவுக் கட்டுப்பாடும் உடற்பயிற்சியும் சேர்ந்தால்தான் அம் மருந்துகள் பலன் கொடுக்கும்.
எடை குறைப்பு மருந்துகள் விலை அதிகமானவை.

வெறுமனே மருந்தை மட்டும் போட்டுக் கொண்டிருந்தால் எடை குறையாமல் போவது மாத்திரமின்றி அம் மருந்துகளின் பக்கவிளைவுகளையும் எதிர் நோக்க நேரிடும்.

சிபியுட்ரமின் (Sibutramine) 

எடை குறைப்பு மருந்துகளில் பிரபலமானது சிபியுட்ரமின் (Sibutramine) என்பதாகும். அதனால் வரக் கூடிய பக்கவிளைவுகளைப் பட்டியலிட்டால் மருந்தை உட்கொள்ள வேண்டாம் என நோயாளி வேகமாக விட்டு ஓடுவார். அவ்வாறு ஓடினால் நிறை குறையும் என்பதை மட்டும் நல்ல விளைவாகக் கொள்ளலாம்.

மருந்தின் பக்க விளைவுகள்

மலச்சிக்கல், வாய் உலருதல். ஓங்காளம்,
உணவுகளின் சுவை கெடுதல், வயிற்றோட்டம்,
மூலநோய் தீவிரமடைதல்,
இருதயத் துடிப்பு வேகமாதல்,
இருதயத் துடிப்பின் ஒழுங்கு லயம் மாற்றமுறல்,
உயர்இரத்த அழுத்தம்,
தலைப்பாரம், தூக்கக் குறைபாடு,
தலையிடி,
மனப்பதற்றம், மனச்சோர்வு நோய்,
வலிப்பு, திடீரென வந்துபோகும் மறதி,
பாலியல் செயற்பாட்டில் குறைபாடு,
ஒழுங்கற்ற மாதவிடாய்,
சிறுநீர் வெளியேறுவதில் சிரமம்,
பார்வை குறைவடைதல் ஏற்படலாம்.

அத்துடன் குருதியில் வெண்துளி சிறுதுணிக்கைகளின் (Platelet) எண்ணிக்கை குறைவடைதல்,
இவ்வாறு குறைந்தால் குருதியின் உறையும் தன்மை குறையும்,
அவ்வாறு குருதியின் உறையும்தன்மை குறைந்தால் சிறிய காயங்களிலிருந்து கூட அதிக இரத்தம் பெருக்கெடுக்கலாம்,
தானாகவே சருமத்தின் கீழ் இரத்தம் கசியலாம்.

மேலும் மருந்தின் ஒவ்வாமை விளைவு காரணமாக
தோல் அரிப்பு, தோற்தடிப்பு,
சரும அழற்சி போன்றவையும் ஏற்படலாம்.

அமெரிக்காவில் இருதய நோயாளர் உபயோகிக்கத் தடை

அமெரிக்காவின் உணவு மற்றும் மருந்து ஆணையம் (FDA) இம் மருந்து பாவனை பற்றி இருதய நோயாளருக்கு புதிய எச்சரிக்கையை விடுத்துள்ளமை கவனிக்கத்தக்கது.

இதுவரை காலமும் இருதய நோயாளர்கள் இம் மருந்தை அவதானத்துடன் உபயோகிக்கலாம் எனக் கூறினார்கள்.

ஆனால் தற்போதைய அறிக்கைப்படி இம் மருந்தை இருதய நோயாளர்கள் பாவிக்கக் கூடாது என கடுமையாக எச்சரிக்கப்பட்டுள்ளது.

அது மாத்திரமின்றி நோயாளருக்கு வழங்கும் மருந்துப் பெட்டியில் இந்த எச்சரிக்கையை தெளிவாக அச்சிடவும் உத்தரவிட்டுள்ளமை குறிப்பிடத்தக்கது.

எத்தகைய நோயாளிகளுக்கு எச்சரிக்கை

  1.  மாரடைப்பு, அஞ்சைனா போன்ற இருதய நோய்கள்
  2. இருதய வழுவல் (Heart failure) 
  3. இருதய துடிப்பின் லயக்குறைபாடுகள் (Arrhythmia )
  4. பக்கவாதம் மற்றும் திடீரென வந்து மறையும் பக்கவாதம்
  5. கடுமையான உயர் இரத்த அழுத்தம்
  6. கால் கை போன்ற பகுதிகளில் உள்ள இரத்தக் குழாய் நோய்கள் (Peripheral arterial disease) 

வேறு மருந்துகள்

எடையைக் குறைக்க வேறு மருந்துகளும் உள்ளன. ஓலிஸ்டட் (Orlistat) என்பது மற்றொரு பிரபல மருந்தாகும்.

இது உணவுக்கால்வாயில் செயற்பட்டு கொழுப்புகள் உறிஞ்சப்படுவதைத் தடுக்கும் மருந்தாகும்.

கொழுப்புப் பொருட்கள் உறிஞ்சப்படாததால் இவை மலவாயிலால் தானே ஒழுகக் கூடியது மிக முக்கிய பிரச்சனையாகும்.
அவசரமாக மலம் கழிக்க நேருதல்,
கட்டுப்படுத்த முடியாமல் திடீரென மலம் வெளியேறுதல்,
வயிற்றுப் பொருமல்,
வயிற்று வலி போன்றவை இம் மருந்தின் பக்க விளைவுகளாகும்.

இவற்றைத் தவிர 

அடிக்கடி சளி பிடித்தல்,
முரசு கரைதல்,
களைப்பு,
தலையிடி, மனப்பதற்றம்,
மாதவிடாய்க் குளப்படிகள்,
சிறுநீரகத் தொற்று நோய்கள்,
குருதியில் சீனியின் அளவு திடீரெனக் குறைதல்,
மூலத்தால் இரத்தம் வடிதல், ஈரல் பாதிப்பு

போன்ற பல பக்க விளைவுகள் ஏற்படலாம்.

பக்க விளைவுகள் அனைத்தும் அனைவருக்கும் வருமா என்றால் நிச்சயமாக இல்லை.

சில பக்க விளைவுகள் சிலருக்கு ஏற்படலாம்.
சிலருக்குப் பல பக்கவிளைவுகள் சேர்ந்தே தோன்றலாம்.
வேறு சிலருக்கு எதுவுமே ஏற்படாமலும் போகலாம்.

அது அவரவர் அதிர்ஷ்டம்.

இருந்தபோதும் அத்தனை பக்கவிளைவுகள் வரக் கூடிய சாத்தியத்துடன் மருந்தைப் பாவித்துத்தான் எடையைக் குறைக்க வேண்டுமா உங்கள் முன் உள்ள தேர்வாகும்.

மருந்துகளை உபயோகித்து எடையைக் குறைத்தாலும்

  • உணவுக் கட்டுப்பாடு, 
  • உடற் பயிற்சி
  • வாழ்க்கை முறை மாற்றங்கள் 
  • இல்லையேல் மருந்தை நிறுத்தியதும் மீண்டும் எடை அதிகரிக்கும் என்பது நிச்சயம்.

உங்கள் எடைக் குறைப்பு முயற்சியை எங்கு ஆரம்பிக்கப் போகிறீர்கள்?

தொடர்ந்து நிலைக்கப் போகிற வாழ்க்கை முறை மாற்றங்களிலா
அல்லது
கடுமையான பக்கவிளைவுகளுடன் குறுகிய காலம் மட்டும் நிற்கப் போகும் மருந்துகளிலா?

நீங்களே தீர்மானித்துக் கொள்ளுங்கள்.

டொக்டர்.எம்.கே.முருகானந்தன்.

0.0.0.0.0.0.0.0

நன்றி:- இருக்கிறம்

Read Full Post »